Er heimilið vel upplýst?

Eitt af því allra mikilvægasta í lýsingarhönnun í dag er að hönnuður komi að verkinu sem allra fyrst. Lýsingin á að vera hluti af heildarhönnun hússins, en ekki einhver hlutur sem er reddað á síðustu stundu. Slíkar „reddingar“ sjást alltaf og bera þess merki að ekki hafi verið faglega að hlutum staðið.

Hvað skiptir máli

Mikilvægt er að hanna lýsingu eftir aðstæðum, og jafnvel eftir því hver mun nota lýsinguna. Það er jú þannig að fólk sem er komið á efri ár ef svo má segja, hafa þörf fyrir mun meiri lýsingu en yngra fólk. Einnig þarf að hafa í huga hvaða rými er verið að hanna í.

Baðherbergi

Lýsing á baðherbergjum getur t.d. verið mjög vandasöm því bæði vill maður hafa hana flotta og sýna einhvern karakter, en hún þarf jafnframt að vera jöfn og góð. Sérstaklega við spegilinn þar sem maður vill að birtan dreyfist jafnt og vel á andlitið þegar maður speglar sig.

Eldhús

Sérstakan gaum þarf einnig að gefa við hönnun á lýsingu í elhúsi. Þar þarf að vera góð vinnubirta yfir vinnusvæði, en jafnframt þarf hún að vera í einhverri tengingu við heildarmyndina í húsinu. Þannig er algengt að hönnuðir tvískipti lýsingu í eldhúsi, noti sömu ljós í loftum og annarsstaðar í húsinu, en bæti svo við auka vinnulýsingu yfir vinnuborði, t.d. ljós undir efri skápum eða gott ljós í eldunarháf.

Herbergi

Lýsing í herbergjum eru svo mun auðveldari viðfangs og eru þar yfirleitt notuð sömu ljós og annars staðar, en bætt kannski við lesljósi, annað hvort á vegg eða í formi borðlampa.

Stofur

Lýsing í stofu er svo tvíþætt, annars vegar mild og „kósý“ lýsing, sem gæti verið í formi standlampa eða vegglampa, og svo grunnlýsing þar sem eðlilegast er að notast við sömu lampaseríu og annars staðar í húsinu.

Heildarmyndin

Mikilvægt í hönnun er að lýsingin skapi einhverja heild og það sé tenging á milli rýma. Svo er um að gera að vera ekki með of margar gerðir eða of flókið mynstur í innfelldum lömpum. Það er eins og í svo mörgu að oftast er einfaldasta lausnin sú skemmtilegasta, „Less is more“. S.Guðjónsson hefur um árabil boðið viðskiptavinum sínum upp á ráðgjöf um val á lýsingarbúnaði, eða jafnvel boðið upp á að hanna í rýmin. En eins og fyrr segir að því fyrr sem hönnuður kemur að verkinu, því betri verður útkoman. Þá er mikilvægt að lýsingarhönnuður og innanhússhönnuður vinni náið saman, svo að útkoman sé hluti af heildarmyndinni.