Áður en lagt er af stað í sumarfríið á bílnum er mikilvægt að fara vel yfir ástand hans því ekki viltu sitja í biluðum bíl uppi á miðri heiði með fjölskylduna pirraða afturí. Því er vert að hafa nokkur atriði í huga áður en ferðalagið hefst.

Ljós

Skoðaðu framljósin, afturljósin, stefnuljósin og perurnar áður en þú leggur af stað, þar sem mikilvægt er að þú sjáir og sjáist í umferðinni. Ef ein pera er farin þá er samsvarandi pera hinum megin sennilega orðin léleg og því ráðlegt að skipta um.

Rúðuþurrkur og rúðuvökvi

Skipta þarf um rúðuþurrkur á eins árs fresti að meðaltali. Notaðu góðan rúðuvökva, en sumir rúðuvökvar innihalda fitu sem sest á rúðuna og ryk getur fest í.

Hjólbarðar

Athugaðu munstur og þrýsting á dekkjum. Mismunandi slit á dekkjum gefur til kynna að bíllinn sé ekki rétt hjólastilltur. Rangur þrýstingur hefur áhrif á hvernig dekkin slitna og aksturseiginleika bílsins. Munsturdýpt má ekki vera minni en 1,6 mm. Skoðaðu einnig varadekkið, athugaðu hvort tjakkurinn er í lagi og vel smurður og kannaðu hvort þú sért með réttan felgulykil.

Stýrisgangur

Skoðaðu spyrnur, stýrisenda og upphengjur.

Að smyrja bílinn

Láttu smyrja bílinn og kannaður olíuleka. Láttu einnig skipta um olíuog frjókornasíu. Frjókornaofnæmi er að aukast og í nýlegum bílum eru sérstakar frjókornasíur.

Rafgeymir

Flest verkstæði eiga álagsmæli og það tekur aðeins fimm mínútur að álagsmæla bílinn. Ef rafgeymirinn er lélegur, skiptu þá um hann. Kannaðu vatnið á rafgeyminum og hreinsaðu pólana.

Kælikerfi

Er nóg af vatni á vatnskassanum?

Lekur vatnskassinn?

Skoðaðu vatnskassahosur, viftureimar og vatnsdælu.

Varúð: Ekki opna vatnskassann ef hann er heitur.

Hemlar

Hemlaprófaðu bílinn og kannaðu hemlaklossana. Ef hemlaklossarnir klárast í ferðalaginu eyðileggja þeir diskinn og viðgerðin getur orðið margfalt kostnaðarsamari. Athugaðu hemlavökvann í forðabúrinu á höfðdælunni. Ef það er lítill vökvi bendir það til þess að hemlaborðar og klossar séu of slitnir eða að það leki vökvi af kerfinu. Ekki bæta vökva á forðabúrið áður en búið er að skoða hemlakerfið.

Höggdeyfar

Lélegir höggdeyfar og gormar hafa áhrif á hemlunarvegalend og aksturseiginleika bílsins.

Kúplingin

Þú þarft ekki að verða var við að kúplingin sé orðin léleg á stuttum vegalengdum. Þegar bíllinn er fullhlaðinn og hann keyrður lengi eykst álagið á kúplinguna og mikill hiti hefur áhrif á lélegar kúplingar. Það er sérstaklega áríðandi að kúpling sé í lagi ef bílinn á að draga aftanívagn líka.

Aftanívagnar og kerrur

Engu minna máli skiptir að aftanívagnar og kerrur séu í lagi áður en brunað er af stað. Er öryggiskeðjan milli bíls og vagns í lagi? Byrjaðu á því að kanna ástand ljósa og gakktu úr skugga um að hemlaljósin og stefnuljósin virki. Athugaðu einnig hvort rafmagnstengið sé í lagi. Hægt er að kaupa plastbretti með ljósum og snúru í bílinn sem er mjög auðvelt að festa aftan á vagninn. Einnig er mikilvægt að dekkin og loftþrýstingur á þeim sé í góðu standi og að varadekkið sé í lagi. Varðandi hliðarspegla þá er hægt að fá framlengingar á flestar gerðir af hliðarspeglum. Allir sem draga fellihýsi, hjólhýsi og stórar hestakerrur verða að nota auka hliðarspegla.

Siðast en ekki síst

Keyrum varlega og ekki gleyma góða skapinu.