Forvarnir eru þær varúðarráðstafanir sem við gerum til þess að koma í veg fyrir eða draga úr hættu á tjóni. Það er innbyggt í flesta ábyrga einstaklinga að læsa húsum sínum, slökkva á eldavél, skrúfa fyrir vatn, spenna bílbeltin o.s.frv. En það er margt annað sem hægt er að gera til að vernda hagsmuni fjölskyldunnar án þess að kosta miklu til.

Þegar heimilið er yfirgefið yfir daginn skal ætíð hafa hurðir læstar og glugga lokaða og krækta aftur. Mikilvægt er að krækjur á gluggum séu traustar og læsingar sterkar og af viðurkenndri gerð. Góð lýsing utan dyra fælir þjófa frá. Gott er að spyrja sjálfan sig eftirfarandi spurninga áður en haldið er að heiman: Eru allar hurðir læstar – og útigeymslan? Er glugginn í þvottahúsinu lokaður? Eru öll áhöld, reiðhjól og önnur tæki læst inni?

Sex leiðir til að auka öryggi heimilisins:

1. Verið með nýleg „þjófheld” stormjárn í gluggum. Hægt er að fá þau í byggingavöruverslunum.

2. Hafið húsnúmer vel sjáanlegt frá götu.

3. Trjágróður má ekki skyggja sýn á húsið frá nágrönnum og götum.

4. Læsið stiga og önnur tól sem hægt er að nota til innbrots inni.

5. Ekki láta þá sem standa fyrir utan húsið sjá verðmæti eins og fartölvur, myndavélar og annað sem auðvelt er að koma í verð.

6. Heppilegt er að koma dýrmætum hlutum eins og frímerkja- eða myntsafni, dýrum skartgripum o.þ.h. fyrir á öruggum stað, t.d. í bankahólfi.

Frágangur fyrir fríið:

Þegar húseign er skilin eftir í langan tíma þarf að vera tryggt að einhver fylgist með henni. Komi eitthvað fyrir, t.d. ef rúða brotnar, rör springur eða ísskápur/frystikista bilar, er hægt að gera ráðstafanir. Takið rafmagnstæki ávallt úr sambandi og einnig sjónvarpsloftnet þegar þið farið í burtu í einhvern tíma. Þjófar leita uppi húseignir sem eru yfirgefnar. Því er mikilvægt að fjarvera heimilisfólks sé ekki augljós. Sá sem lítur eftir húseigninni þarf að taka dagblöð og póstinn svo ekki sjáist að hann safnist fyrir. Hann mætti setja rusl í ruslatunnuna svo hún standi ekki lengi tóm. Þá má gjarnan láta sum ljós vera logandi. Í Öryggisverslun VÍS er hægt að festa kaup á sérstökum tímarofa sem kveikir og slekkur ljósin reglulega til þess að villa um fyrir hugsanlegum innbrotsþjófum. Látið stiga ekki liggja á glámbekk í garðinum. Það er mjög gott að skrá verðmæta muni, s.s. sjónvarp, tölvu, myndavélar og skartgripi (þá verður að einkenna með raðnúmeri sem grafið yrði í þá) í Crime-On-Line skráningakerfið á Netinu. Með því er hægt að minnka líkurnar á þjófnaði og auka líkurnar á því að finna stolna hluti aftur. Tryggingafélögin hafa séð til þess að hver Íslendingur fái 100 fríar skráningar í þetta kerfi.

Fimm varúðarráðstafanir fyrir fríið:

1. Mestu skiptir að heimilið líti út fyrir að einhver sé heima.

2. Muna verður eftir símsvaranum, að hann tilkynni ekki um fjarveru íbúa og hversu lengi þeir verða í burtu.

3. Þar sem kappkosta þarf að láta líta út fyrir að einhver sé heima er t.a.m. sniðugt að hafa þvott á snúru og fá nágranna til að nota bílastæðið.

4. Uppsafnaður póstur auglýsir fjarveru íbúa.

5. Biðja vini og vcandamenn um að koma reglulega og breyta ljósum, eða kaupa tímarofa.

Nágrannavarsla:

Ef þess er kostur er upplagt að virkja nágrannana til þess að fylgjast með íbúðinni. Þeir eru líklegir til að verða varir við óeðlilegar mannaferðir og geta e.t.v. lagt bílnum sínum í innkeyrsluna þína.

1. Rétt er að gera skrá yfir aðra verðmæta hluti og jafnvel taka myndir af þeim til að eiga ef menn yrðu svo óheppnir að verða fyrir barðinu á innbrotsþjófum.

2. Loðinn grasblettur getur gefið vísbendingar um mannlaust hús.

3. Gæta þarf þess að ganga tryggilega frá hurðum og gluggum og skilja ekki varalykil eftir á vafasömum stað.

Farið að heiman yfir daginn:

1. Áframstillið heimasíma í vinnu eða farsíma. Innbrotsþjófar hringja oft á undan sér til að vita hvort einhver sé heima.

2. Einnig er gott að skilja eftir útvarp í gangi, hæfilega hátt stillt og hafa ljós kveikt á sýnilegum stað í húsinu.

Önnur almenn öryggisatriði:

1. Eru sjúkragögn á staðnum og eru þau yfirfarin reglulega?

2. Eru eldvarnarteppi til staðar og stakir reykskynjarar á staðnum / virkir?

3. Eru reykskynjarar vel staðsettir?

4. Eru vatnsskynjarar á staðnum?

5. Er bruna- og innbrotaviðvörunarkerfi?

6. Er neyðarstigi fyrir ofan 2.hæð?

7. Eru brunaslöngur?

8. Er rafmagnstafla aðgengileg og rofar vel merktir?

9. Eru neyðarútgangar vel merktir?

10. Eru flóttaleiðir greiðar?

11. Skapa gólfefni hættu á falli?

12. Eru reykingar leyfðar?

13. Er vel gengið frá rafmagnsinnstungum?

14. Er sérstök hætta s.s. gaskútar, eldfim efni?

15. Er greið leið fyrir slökkvilið, sjúkrabíl að húsinu?

Ímyndið ykkur að þið séuð læst úti...

hvernig mynduð þið komast inn?

Þannig hugsar þjófurinn og hann notar

sömu aðferð og þú.

Leitarorð : öryggisþjónusta , öryggi , þjófavörn, þjófavarnarkerfi, brunavarnarkerfi , eldvarnarteppi, slökkvitæki , hreyfiskynjarar, innbrotavarnir

Þessi ráðgjafi er í boði Öryggismiðstöðvar Íslands

Frekari upplýsingar : http://www.oryggi.is